Joh 18 | MHL | STEP | Aria Yeesus Mua Maneka farep-puap ona teeria wiamiya oromi Kidron epa uruma puukap okaiwi ekamik. Epa nain nomokow unowa ikua. Ne wi ikiwep nan ikemik.

John 18

Yuudas-ke Yeesus wi iiwua wapena-pa wiar wuak

(Matiu 26.47-56, Mak 14.43-50, Luk 22.47-53)

1 Aria Yeesus Mua Maneka farep-puap ona teeria wiamiya oromi Kidron epa uruma puukap okaiwi ekamik. Epa nain nomokow unowa ikua. Ne wi ikiwep nan ikemik. 2 Yeesus anane ona teeria wiamiya ikiwep nan ikaimik. Naapeya Yuudas eena Yeesus wi iiwua wapena-pa wiar wuowa nain epa nain amisarek. 3 Ne os-ke wi Rom anim onom teeria papako ne wi tempel ami mua wia aawep unowiya ikiwemik. Wi teeria nain wi pris woos mua ne wi Farisi-ke wia sesekamik. Wiena parina ne arua isimap irakow maa opap feekiya ikiwemik. 4 Aria wi ikoka kamenap onikuan nain Yeesus-ke wiar amisarep wi urupiwkin ekap wia nokarek, “Ni naarew akupiman?” 5 Ne maakemik, “I Nasaret owow mua Yeesus naimik nain akupimik.” Ne wia maakek, “Yo fan ikem.” (Ne Yuudas pun wi wiamiya nan iimarep ikua.) 6 Ne aria Yeesus-ke naap maeya wi mikikiriw erami miiwa-pa wakiemik. 7 Ne nainiw wia nokarek, “Ni naarew akupiman?” Ne maemik, “Nasaret mua Yeesus.” 8 Ne wia maakek, “Yo iiriw nia maakem, yo fan ikem. Ni yos-ke efa naep-na yena teeria fain me wia opaka, wi ikiwuk.” 9 Ona teeria mua kuisow-ko me opamik. Naeya Yeesus ona iiriw maek nain makena arek, feenap, “Wi teeria nena yien nain kuisow-ko me mesenalek.”

10 Ne Saimon Pita-ke naap urufap fura maala mufep aawep pris maneka uuwow mua ifana aken ekeria wiar puukak. Mua nain unuma Malkus. 11 Ne Yeesus-ke Pita maakek, “Fura nain neek wue. Yo Auwa suusa yiep-puak nain iirarinen-i? Weetak akena.”

Yeesus aawep Aanas wiar pikiwemik

12 Ne aria wi anim onoma wiena woos mua onaiya ne wi tempel ami mua teeria, wi unowiya Yeesus opap kaikap pikiwemik. 13 Ne Aanas kiikir wiar pikiwemik. Aanas-na Kaiafas emeria wiawi-ke. ^{▼▼18.13Aanas o pris woos mua-ke. Nain wi Rom anim onoma-ke o iirarep ona war Kaiafas pris woos mua wuamik. Aanas mua unumiya-ke, naeya wi Yuuda o pris woos mua-ke naemik. Naapeya Yeesus kiikir o wiar pikiwemik.} Iir nain wi pris woos mua Kaiafas-ke ikua. 14 Iiriw os-ke Yeesus maemi maek, “Mua kuisow-ke epa yiar aawep uminok.”

Pita-ke Yeesus me amisarem naek

(Matiu 26.69-70, Mak 14.66-68, Luk 22.55-57)

15 Aria Saimon Pita, Yeesus teeria mua oko ikos pun wi wiamiya aremi Yeesus ookamik. Pris woos mua, mua oko nain amisarek. Naapeya Yeesus ookami pika kemena ikiwok. 16 Ne Pita-ke pika omopora-pa nan iimarep ikua. Nan ikaeya mua oko nain-ke orop emeria eena omopora urufiya nain maakep Pita aawep kemena pikiwok. 17 Ne emeria nain-ke Pita maakek, “Nos pun me mua nain teeria-ki?” Naeya maakek, “Sa, yo weetak.” 18 Bug dabela oreya wi uuwow mua ne wi ami mua mia fulilep epia arem-ikemik. Pita pun wi wiamiya epia arem-ikua.

Pris woos mua-ke Yeesus nokarek

(Matiu 26.59-66, Mak 14.55-64, Luk 22.66-71)

19 Ne aria pris woos mua awona-ke Yeesus nokarek, ona teeria wi mua kame-kamenap ookamik, ne opora sira kamenap wia maakem-ikua nain pun iiwawun nokarek. 20 Nokareya maakek, “Yo anane mua unowa mokok epa-pa opora ariman maiyem, ne lotu koora-pa e tempel kemena-pa wia maakem-ikem. Yo opora kuisow kokot-ko me maem-ikem. 21 Naeya yo moram efa nokarin? Wi eena yo opora efar miimam-ikemik nain wia nokare. Wi amisarep ikemik.” 22 Naap maeya ami mua oko-ke iikirap ifan epepiria aawemi maakek, “Pris woos mua opora naap-ko maakimik-i?” 23 Ne Yeesus-ke maakek, “Yo opor makena maem nain moram efa arufan? Ne opor samora maemkun-na baliwep efa maake.” 24 Yeesus eena kaikamik nain naap ikaeya Aanas-ke pris woos mua Kaiafas wiar sesekak.

Pita-ke Yeesus me amisarem naek nain nainiw maek

(Matiu 26.71-75, Mak 14.69-72, Luk 22.58-62)

25 Aria Saimon Pita iimarep epia arem-ikaeya papako-ke maakemik, “Makena, no o teeria-ke, ae-na?” Ne wia maakek, “Sa, yo weetak.” 26 Wi pris woos mua uuwow mua-ko nan ikua, Pita eena mua oko ifana wiar puukak nain kaka-ke. Os-ke Pita maakek, “Nos pun o wameiya nomokow pupura-pa nan ikon, yo me nefa urufam-i?” 27 Naeya Pita-ke maakek, “Weetak akena.” Naap maem-ikaeya aara farek.

Yeesus Pailat wiar pikiwemik

(Matiu 27.1-2 ne 27.11-14, Mak 15.1-5, Luk 23.1-5)

28 Ne uuriw akena Yeesus Kaiafas koora-pa wiar ikaeya aawep wi Rom anim onom maneka koora wiar pikiwemik. Wi Yuuda-ke wi owow oko mia muura me wiar aawiyen naep pika kemena me ikiwemik. Moram wi mia eliwa ikok Pasowa maa enimiyen naemik. 29 Naapeya Pailat-ke orop wia nokarek, “Nee, ni mua fain maa mauwa oneya opora-pa wuaman?” 30 Naeya maakemik, “Makena, i mua nain sira samor akena me onekak-na feek me pekapekamik.” 31 Ne Pailat-ke wia maakek, “Aa-na pikiwep niena sira ookami opora-pa wueka.” Ne maakemik, “Nain, i mua pina wiar imenap wia ifakimowa nain kekanowa me yiemik.” ^{▼▼18.31Wi Yuuda Rom tepak-pa ikemik nain, maa papako wiena kot-pa kakenamik. Nain mua wia ifakimowa kekanowa wi Rom muutiw wiar ikua, wis-ke nomokow moke-pa wia ifakimem-ikemik.} 32 Yeesus iiriw eena sira kamenap umowa wame maek nain makena arek.

33 Ne Pailat nainiw koora ikiwep Yeesus farek. Ekapeya nokarek, “No wi Yuuda saria-ki?” 34 Naeya maek, “No nena kema-pa maen-i e mua papako-ke nefa maakiwkin maen?” 35 Naeya Pailat-ke maakek, “Yo Yuuda-ki? Naeya sira nain niar amisarinen. Nena Yuuda teeria-ke wi pris woos mua unowiya nefa opap fan nefa amapekapemik. Naeya nefa nokariyem, no maa mauwa oneya sira naap nefa onamik?” 36 Ne maakek, “Yo saria maneka-ke, nain yo me miiwa fain sira saria ikem, yo yena onaiya. Yo miiwa fain saria ikekam-na yo efa opamik nain yena teeria-ke iikirami wi Yuuda wiamiya irakekamik. Weetak, yo me miiwa fain saria-ke.” 37 Ne Pailat-ke kiiriw maakek, “Naap nain no saria-ke name main-yon.” Naeya maek, “No pepek main, yo saria-ke. Yo opor makena miiw mua nia maakowa naep imenarem. Ne wi mua opor makena kookalimik nain efa miimikuan,” naap maek. 38 Ne Pailat-ke nokarek, “Opor makena nain kamenap?”

Pailat-ke Yeesus ifakimowa naek

(Matiu 27.15-31, Mak 15.6-20, Luk 23.13-25)

Pailat nainiw orop wi Yuuda wia maakek, “Nee, yo mua fain pina-ko me wiar imenam noma. 39 Nain yo niena sira ookami wi mua koora ekap ikemik nain Pasowa fofa-pa mua kuisow piipuiyem. Naapeya ni Yuuda owow saria fain nia piipuominen-i?” 40 Naeya faremi maemik, “O weetak, i Barabas kookalimik, yia piipuoma!” Naap maemik. Barabas-na wi Rom anim onoma opora wiar fienap irakowa maneka imenak. Naapeya opap koora-pa wuamik.